ചാലിശേരി കവുക്കോട് ശ്രീ കുളത്താണി വിഷ്ണു ശാസ്ത ക്ഷേത്രത്തിലെ പൂരമഹോത്സവം ഇന്ന് ആഘോഷിക്കും. രാവിലെ നാലിന് നടതുറന്ന് വിശേഷാല് പൂജകള്ക്ക് മേല്ശാന്തി മംഗലത്ത് നാരായണന് നമ്പൂതിരി കാര്മ്മികത്വം വഹിച്ചു. തുടര്ന്ന് പട്ടിശ്ശേരി കൃഷ്ണകൃപ സംഘത്തിന്റെ തിരുവാതിരകളി, നടക്കല് പറവെപ്പും ഉണ്ടായി. ഉച്ചക്ക് 3 ന് ദേവസ്വം പൂരം എഴുന്നെള്ളിക്കും. വാദ്യകലാകാരന്മാരായ കവുകോട് മണി , തിച്ചൂര് സുധി , വരവൂര് അപ്പു, ആലംകോട് വേണു, കടവല്ലൂര് മോഹനന് മാരാര്എന്നിവരുടെ പ്രമാണത്തില് പഞ്ചവാദ്യവും, മേളത്തില് ആലിക്കര ഉണ്ണികൃഷ്ണനും നേതൃത്വം നല്കും. ഗജവീരന് വടക്കുനാഥന് ശിവന് ദേവിയുടെ തിടമ്പേറ്റും. തുടര്ന്ന് പതിമൂന്നോളം ദേശ പൂരങ്ങള് ക്ഷേത്രത്തിലെത്തും.
രാത്രിയില് ദീപരാധന, ചുറ്റുവിളക്ക് , ആലിക്കര ഗൗരിദാസിന്റെ തായമ്പകയും അരങ്ങേറും. ശേഷം കൊമ്പ് പറ്റ് ,കുഴല്പറ്റ് , കേളി എന്നിവ നടക്കും രാത്രി എട്ടിന് കമ്പനിപ്പടി പൂരാഘോഷ കമ്മിറ്റിയുടെ ഗാനമേളയും അരങ്ങേറും. വ്യാഴാഴ്ച്ച പുലര്ച്ചെ 3 മണിക്ക് താലത്തോടുകൂടി ദേവസ്വം പൂരം എഴുന്നെള്ളിക്കും. പൂരാഘോഷത്തിന് കുളത്താണി ദേവസ്വം പ്രസിഡന്റ് കെ ശങ്കരന്നായര് , സെക്രട്ടറി കെ രവീന്ദ്രന് , ട്രഷറര് ഗോവിന്ദന് നായര് എന്നിവരടങ്ങുന്ന ദേവസ്വം കമ്മിറ്റി നേതൃത്വം നല്കും.
