2025 – 26 അധ്യയന വര്‍ഷത്തെ ചാവക്കാട് ഉപ ജില്ലാ ശാസ്ത്രമേള ഒക്ടോബര്‍ 21, 22 തിയതികളില്‍ കടിക്കാട് ഗവ ഹയര്‍ സെക്കന്ററി സ്‌കൂള്‍, പുന്നയൂര്‍ക്കുളം രാമരാജ മെമ്മോറിയല്‍ യുപി സ്‌കൂള്‍ എന്നിവടങ്ങളില്‍ വെച്ച് നടക്കും. മേളയുടെ ഉദ്ഘാടനം 21-ാം തിയതി രാവിലെ 10 മണിക്ക് ഗുരുവായൂര്‍ എംഎല്‍എ – എന്‍.കെ അക്ബര്‍ നിര്‍വ്വഹിക്കും. സമാപന സമ്മേളനം 22-ാം തിയതി വൈകീട്ട് മണലൂര്‍ എംഎല്‍എ മുരളി പെരുനെല്ലി ഉദ്ഘാടനം ചെയ്യും. ജില്ല പഞ്ചായത്ത് വിദ്യാഭ്യാസ സ്റ്റാന്റിങ് കമ്മിറ്റി ചെയര്‍മാന്‍ റഹീം വീട്ടിപ്പറമ്പില്‍ , പുന്നയൂര്‍ക്കുളം ഗ്രാമ പഞ്ചായത്ത് പ്രസിഡന്റ് ജാസ്മിന്‍ ഷഹീര്‍, ഗുരുവായൂര്‍ നഗരസഭാ ചെയര്‍മാന്‍ എം കൃഷ്ണദാസ് തുടങ്ങിയവര്‍ പങ്കെടുക്കും. ഉപജില്ലയിലെ 96 സ്‌കൂളുകള്‍ മേളയില്‍ പങ്കെടുക്കും. സയന്‍സ് , സോഷ്യല്‍ സയന്‍സ് മേളകള്‍ക്ക് പുന്നയൂര്‍ക്കുളം രാമരാജ മെമ്മോറിയല്‍ യുപി സ്‌കൂള്‍ വേദിയാകും. പ്രവൃത്തിപരിചയ മേളയും ഐ ടി, ഗണിതശാസ്ത്രമേളകളും കടിക്കാട് ഗവ ഹയര്‍ സെക്കണ്ടറി സ്‌കൂളില്‍ നടക്കും. രണ്ടു ദിവസങ്ങളിലായി 3350 കുട്ടികള്‍ മേളയില്‍ പങ്കെടുക്കും.
