സംസ്ഥാനത്ത് നിയമസഭ തെരഞ്ഞെടുപ്പിന്റെ പോളിങ് സമയം അവസാനിച്ചു. എന്നാല്, ഇപ്പോഴും ക്യൂവില് നിരവധി ആളുകളാണ് പലയിടത്തുമുള്ളത്. ആറ് മണി വരെ വരിയില് ഉണ്ടായിരുന്നവര്ക്കെല്ലാം ടോക്കണ് നല്കിയിട്ടുണ്ട്. വൈകിട്ട് അഞ്ച് മണി വരെ കേരളത്തില് 75.01 ശതമാനം പോളിംഗ് രേഖപ്പെടുത്തിയത്. എസ്ഐആറിനെ തുടര്ന്ന് ഇത്തവണ പോളിംഗ് 80 ശതമാനം കടക്കുമെന്നാണ് സൂചന.
എറണാകുളം ജില്ലയിലാണ് കനത്ത പോളിംഗ്. കാസര്കോടും പത്തനംതിട്ടയിലുമാണ് പോളിംഗ് കുറവ്. മേയ് 4നാണ് വോട്ടെണ്ണല്.
883 സ്ഥാനാര്ത്ഥികള് 23 ദിവസം നടത്തിയ ചൂടേറിയ പ്രചാരണത്തിനൊടുവിലാണ് കേരളം പോളിംഗ് ബൂത്തിലേക്ക് എത്തിയത്. 140 മണ്ഡലങ്ങളിലെ 30,495 ബൂത്തുകളിലാണ് വോട്ടെടുപ്പ് നടന്നത്. സംസ്ഥാനത്ത് ആകെ 2 കോടി 71 ലക്ഷം പേരാണ് വോട്ടര് പട്ടികയിലുള്ളത്. പോളിംഗ് ബൂത്തുകളില് ഇപ്പോഴും വോട്ടര്മാരുടെ ക്യൂ തുടരുന്നതിനാല് മികച്ച കണക്കിലേക്ക് കേരളത്തിലെ പോളിംഗ് ശതമാനം ഉയരുമെന്നാണ് പ്രതീക്ഷ. പോളിംഗ് ശതമാനം 90 കടന്നേക്കുമെന്നാണ് മുഖ്യ തെരഞ്ഞെടുപ്പ് ഓഫീസര് രത്തന് ഖേല്ക്കര് അഭിപ്രായപ്പെട്ടത്.
1960-ലെ കേരള നിയമസഭ തെരഞ്ഞെടുപ്പില് രേഖപ്പെടുത്തിയ 85.72% ആണ് സംസ്ഥാനത്തെ ഏറ്റവും ഉയര്ന്ന പോളിംഗ്. 1987-ല് നടന്ന നിയമസഭാ തെരഞ്ഞെടുപ്പിലാണ് അവസാനമായി 80 ശതമാനം പോളിംഗ് രേഖപ്പെടുത്തിയത്. 80.5 ശതമാനം ആയിരുന്നു 87-ലെ പോളിംഗ് നില. 74.06 ശതമാനമായിരുന്നു 2021ലെ തെരഞ്ഞെടുപ്പില് പോളിംഗ്.
