വിനോദയാത്രയ്ക്കായി വിദേശരാജ്യങ്ങള്‍ തെരഞ്ഞെടുക്കുമ്പോള്‍ സ്വന്തം നാട്ടിലെ കാഴ്ചകള്‍ കാണാന്‍ മറക്കരുതെന്ന് ഓര്‍മ്മിപ്പിക്കുകയാണ് പ്രാദേശിക സഞ്ചാരം’ കൂട്ടായ്മ. കേരളത്തിലെ കാടുകളിലൂടെയും മലകളിലൂടെയും സഞ്ചരിച്ച് നാടിനെ അറിയുന്നതിനൊപ്പം പ്രകൃതിയെ സംരക്ഷിക്കുക കൂടിയാണ് ഈ കൂട്ടായ്മയുടെ ലക്ഷ്യം. മലയാളി കേരളം കാണുക’ എന്ന ലക്ഷ്യത്തോടെ നാല് വര്‍ഷം മുമ്പാണ് ഒരു പറ്റം പ്രകൃതിസ്‌നേഹികള്‍ കൂട്ടായ്മ രൂപീകരിക്കുന്നത്. കേരളത്തില്‍ അറിയപ്പെടാതെ കിടക്കുന്ന നിരവധി പ്രകൃതിയിടങ്ങളെ പരിചയപ്പെടുത്തുക, വനം സംരക്ഷിക്കുക എന്നിവയാണ് ഇവര്‍ ലക്ഷ്യമിടുന്നത്. ഇതിനായി രണ്ടുതരം യാത്രകളാണ് സംഘടിപ്പിക്കുന്നത്. ആദ്യത്തേത് മാനസിക ഉല്ലാസവും രണ്ടാമത്തേത് വന സംരക്ഷണവുമാണ് ലക്ഷ്യം. 9 തവണ അഗസ്ത്യാര്‍കൂടം അടക്കം മീശപ്പുലിമല, മതി കെട്ടാന്‍ ചോല, മാനമുട്ടിമല തുടങ്ങി സ്ഥലങ്ങളിലേക്ക് 67 യാത്രകള്‍ ഇതുവരെ നടത്തിയതായി കൂട്ടായ്മ കോഡിനേറ്ററ്റും ഗുരുവായൂര്‍ സ്വദേശിയുമായ ഷാഫി തെരിയത്ത് പറഞ്ഞു. വനത്തിലെ പ്ലാസ്റ്റിക് മാലിന്യങ്ങള്‍ നീക്കം ചെയ്യുക, ചെക്ക് ഡാമുകള്‍ നിര്‍മ്മിക്കുക, വിത്തൂട്ട് നടത്തുക, അധിനിവേശ സസ്യങ്ങളെ നീക്കം ചെയ്യുക തുടങ്ങിയ പ്രവര്‍ത്തനങ്ങളാണ് വനസംരക്ഷണ യാത്രയുടെ ഭാഗമായുള്ള കാടൊരുക്കത്തില്‍ നടക്കുന്നത്.വനം വന്യജീവി വാരാഘോഷത്തോടനുബന്ധിച്ച് അഞ്ചാമത് ‘കാടൊരുക്കം കഴിഞ്ഞ ദിവസം നെയ്യാര്‍ ഡാം പരിസരത്താണ് നടന്നത്. ഒന്‍പത് വയസ്സുമുതല്‍ 62 വയസ്സുവരെയുള്ള 46 പ്രകൃതിസ്‌നേഹികള്‍ പരിപാടിയില്‍ പങ്കെടുത്തു. വനമേഖലയിലെ ജലസംരക്ഷണത്തിനായി ഏകദേശം 25 ചെക്ക് ഡാമുകളും നിര്‍മ്മിച്ചു. കാടിന്റെ വേരുകള്‍ കാക്കും, ലഹരിയാകണം നമ്മള്‍; കാട്ടുകുരുതിയില്‍ പിടയണം; പ്ലാസ്റ്റിക് വിഷം തീനികള്‍ എന്ന സന്ദേശം ഉയര്‍ത്തി കാടുകളുടെ ജൈവവൈവിധ്യം സംരക്ഷിക്കുന്നതിനാണ് കൂട്ടായ്മ പ്രാധാന്യം നല്‍കുന്നത്. ഇതിനെ വനവകുപ്പിന്റെ പരിപൂര്‍ണ സഹകരണവും ഉണ്ട്. വാട്‌സ്ആപ്പ് ഗ്രൂപ്പിലൂടെ താല്‍പര്യമുള്ള ആര്‍ക്കും കൂട്ടായ്മയുടെ ഭാഗമാകാം.യാത്ര വിനോദം മാത്രമല്ല, സ്വന്തം നാടിനെ അറിയാനും കാടിനെ കാക്കാനുമുള്ള ഉത്തരവാദിത്വം കൂടിയാകുമ്പോള്‍ ‘പ്രാദേശിക സഞ്ചാരം’ വ്യത്യസ്തമായൊരു യാത്രാസംസ്‌കാരത്തിനാണ് വഴിയൊരുക്കുന്നത്.
