20 വര്ഷത്തിന് ശേഷമുള്ള പൂര്വവിദ്യാര്ഥി സംഗമത്തിന്റെ ഭാഗമായി പെരുമ്പിലാവ് അന്സാര് ഇംഗ്ലീഷ് സ്കൂള്, സമാരിറ്റന്സ് 2005 ബാച്ചിന്റെ നേതൃത്വത്തില് മെഡിക്കല് ക്യാമ്പ് സംഘടിപ്പിക്കുന്നു. സ്കൂളിലെ വിദ്യാര്ത്ഥികള്ക്കും അധ്യാപകര്ക്കും മറ്റു ജീവനക്കാര്ക്കുമായാണ് ‘സ്പന്ദനം 2025’ എന്നപേരില് സൗജന്യ മെഡിക്കല് ക്യാമ്പ് നടത്തുന്നത്. ചൊവ്വാഴ്ച രാവിലെ 9 ന് സ്കൂള് ക്യാമ്പസില്, അന്സാര് സ്കൂള് ഡയറക്ടര് ഡോ. നജീബ് മുഹമ്മദ് മെഡിക്കല് ക്യാമ്പ് ഉദ്ഘാടനം ചെയ്യും. പൂര്വ വിദ്യാര്ത്ഥികളായ ഡോ. എം എ ഹനി, ഡോ. പി എ ജുനൈന, ഡോ. അജാസ് ബിന് അബ്ദു എന്നിവര് രോഗികളെ പരിശോധിക്കും. ചടങ്ങില് 2005 ബാച്ചിന്റെ ഗ്രാന്റ് അലുംനി മീറ്റായ ‘ഒരിക്കല്ക്കൂടി’ ലോഗോ പ്രകാശനം സ്കൂള് പ്രിന്സിപ്പല് ഇ എം ഫിറോസ് നിര്വഹിക്കും. വൈസ് പ്രിന്സിപ്പല് ഷൈനി ഹംസ അധ്യക്ഷത വഹിക്കും. ഇതോടനുബന്ധിച്ച് രാവിലെ 9.30 മുതല് ഉച്ചക്ക് 1.30 വരെ സ്കൂളില് രക്തദാന ക്യാമ്പും സംഘടിപ്പിക്കുന്നുണ്ട്. രക്തദാനം നടത്താന് ആഗ്രഹിക്കുന്നവര് 98 47 55 52 78 നമ്പറില് രജിസ്റ്റര് ചെയ്യേണ്ടതാണ്.
