മന്ത്രിയ്ക്ക് എസ് കോര്‍ട്ട് പോയ പോലീസ് ജീപ്പ് ഡിവൈഡറിലേക്ക് ഇടിച്ചുകയറി പോലീസുകാരന് നിസാര പരിക്ക്.ചൂണ്ടല്‍ സെന്ററിലെ ഡിവൈഡറിലേക്ക് ഇടിച്ചുകയറിയാണ് അപകടം സംഭവിച്ചത്. തിങ്കളാഴ്ച്ച രാത്രി രാത്രി 9.45 നാണ് അപകടമുണ്ടായത്. കുന്നംകുളം ഭാഗത്തുനിന്ന് തൃശൂര്‍ ഭാഗത്തേക്ക് മന്ത്രിക്ക് എസ്‌കോര്‍ട്ട് പോവുകയായിരുന്ന ജീപ്പാണ് അപകടത്തില്‍പ്പെട്ടത്.അപകടസമയത്ത് വാഹനത്തില്‍ നാല് പോലീസ് ഉദ്യോഗസ്ഥരാണ് ഉണ്ടായിരുന്നത്. ഇതില്‍ ഒരു പോലീസുകാരന് നിസാര പരിക്കേറ്റു. ഇദ്ദേഹത്തെ കാണിപ്പയ്യൂരിലെ യൂണിറ്റി ആശുപത്രിയില്‍ എത്തിച്ച് പ്രാഥമിക ചികിത്സ നല്‍കിയ ശേഷം വിട്ടയച്ചു.മേഖലയില്‍ അപകടം നിത്യസംഭവമാണെന്നും ഡിവൈഡറിന് മുന്നറിയിപ്പ് ബോര്‍ഡുകള്‍ സ്ഥാപിക്കാത്തതാണ് അപകടങ്ങള്‍ക്ക് കാരണമെന്നും നാട്ടുകാര്‍ ആരോപിച്ചു. ദിനംപ്രതിയെന്നോണം നിരവധി അപകടങ്ങളാണ് ഈ ഡിവൈഡറില്‍ വാഹനങ്ങള്‍ ഇടിച്ചുകയറി ഉണ്ടാകുന്നതെന്നും നാട്ടുകാര്‍ പറയുന്നു. സംഭവത്തില്‍ ബന്ധപ്പെട്ട അധികൃതര്‍ അടിയന്തര നടപടി സ്വീകരിക്കണമെന്ന് നാട്ടുകാര്‍ ആവശ്യപ്പെട്ടു. മേഖലയില്‍ തെരുവ് വിളക്കുകള്‍ കത്താത്തതും അപകടങ്ങള്‍ക്ക് കാരണമാകുന്നുണ്ട്.
